Deputat: “Heydər Əliyev bizə inkişaf edən Azərbaycan bəxş edib”

“Bu gün – 12 dekabr ümumilli lider, dahi şəxsiyyət, müstəqil Azərbaycanın banisi Heydər Əliyevin anım günüdür. Ulu öndər istər sovet dövründə, istərsə də müstəqillik illərində Azərbaycanın tərəqqisi naminə çalışıb, ömrünü xalqın rifahının yaxşılaşmasına həsr edib”.

Bunu Pravda.az-a açıqlamasında Milli Məclisin deputatı Cavid Osmanov deyib.

Deputat xatırladıb ki, Azərbaycan 1990-cı illərin əvvəllərində yeni qazandığı müstəqilliyi itirmək təhlükəsi ilə üz-üzə idi: “AXC-Müsavat cütlüyünün, xəyanətkar dəstənin səriştəsiz rəhbərləri ölkədə xaos, anarxiya yaratmışdı. Faktiki ölkədə vətəndaş müharibəsi idi, ölkə daxildən parçalanırdı, bir tərəfdən də erməniləri torpaqlarımızı işğal edirdilər. Bu zaman xalqın köməyinə Heydər Əliyev gəldi. Xalqın təkidli tələbi ilə ulu öndər Bakıya gəlməsəydi, müstəqil Azərbaycan haqqında danışmaq çox çətin olardı. Xəyanətkarların rəhbərliyi ilə ölkədə baş verənlər müstəqilliyi zərbə altında qoymuşdu. Heydər Əliyev hakimiyyətə gəldikdən sonra Ermənistanla Azərbaycan arasında atəşkəs elan olundu, “Əsrin müqaviləsi” imzalandı, beynəlxalq təşkilatlarla əlaqələr quruldu. “Əsrin müqaviləsi”nin imzalanması ilə ölkə iqtisadiyyatı dirçəldi. Həmin müddətdən sonra bütün sahələrdə inkişaf başladı. Heydər Əliyev bizə inkişaf edən Azərbaycan bəxş edib. 2003-cü ildə Heydər Əliyev Azərbaycan xalqına müraciət edərək qeyd etdi ki, İlham Əliyevə inanır, onun fəaliyyətindən əmindir. Bildirmişdi ki, xalq üçün başa çatdıra bilmədiyi işləri İlham Əliyev həyata keçirəcək, reallaşdıracaq. Həmin dövrdə radikal müxalifət bir qədər aktivləşmişdi. Çalışırdılar ki, Heydər Əliyevin səhhətində olan problemdən istifadə etsinlər, hakimiyyəti ələ keçirsinlər. Azərbaycanı sevməyən qüvvələr də müxalifətə dəstək verirdi. Onlar ölkədə qarşıdurma yaratmağa çalışırdılar, Azərbaycanı 1990-cı illərin əvvəllərindəki vəziyyətə salmaq istəyirdilər. Xalq o zaman İlham Əliyevin fəaliyyətindən xəbərdar idi, ona görə də Heydər Əliyev siyasətinin davam etdirilməsi yolunu dəstəklədilər”.

C.Osmanov qeyd edib ki, hazırda ölkədə xalq-iqtidar birliyi var: “Xalq müxalifəti layiqi olduğu yerə atıb. Bu gün də Heydər Əliyev ideyaları, siyasəti Prezident İlham Əliyevin rəhbərliyi altında yaşayır, inkişaf etdirilir. Hər bir vətəndaş çalışır ki, Heydər Əliyevin anım günündə onun məzarını ziyarət etsin. Bu, xalqın ulu öndərə verdiyi dəyərdir. Nə qədər ki, müstəqil Azərbaycan var, Heydər Əliyevin ideyaları yaşayacaq, onun siyasi kursu davam etdiriləcək. Xalq əsrlər keçsə də, ümummilli liderin Azərbaycan üçün etdiklərini unutmayacaqlar. Çox yaxşı haldır ki, ulu öndərin adını daşıyan, humanizm prinsiplərini əsas götürən Heydər Əliyev Fondu fəaliyyət göstərir. Birinci vitse-prezident Mehriban xanım Əliyevanın rəhbərlik etdiyi Fond xeyriyyə məqsədilə yüzlərlə layihə həyata keçirib. Bu da Heydər Əliyevin ideyalarının yaşadılması deməkdir. Əminəm ki, bundan sonra belə olacaq”.

Tarix: 12 Dekabr 2019, 13:15

Xəbər lenti